भिडियो प्रदर्शन

प्रदर्शन भयो विशेष स्वागत कार्यक्रमको भिडियो, गगन कै भाषणले तान्यो ध्यान

एन बी सफल
२०७० श्रावण १०
             नेपाल विद्यार्थी संघ, वन विज्ञान अध्ययन संस्थान, पोखरा क्याम्पस इकाईले गत बैशाख ३ गते सम्पन्न गरेको विशेष स्वागत कार्यक्रमको भिडियो बुधबार विशेष प्रदर्शन गरिएको छ । संस्थानको सेमीनार हलमा प्रदर्शन गरिएको भिडियो हेर्न विद्यार्थी र कर्मचारीहरु उपस्थित थिए । भिडियो प्रदर्शन भइरहँदा कार्यक्रमका प्रमुख अतिथि गगन थापाको भाषणले फेरी एकपटक सबैको ध्यान खिच्यो ।

कस्तो थियो गगनको मन्तव्य ?
          हुन त गगन थापाको भाषण भनेपछि युवादेखी पाकासम्म सबैको मन तानिन्छ । वन विज्ञान अध्ययन संस्थानको कार्यक्रममा रहँदा पनि कार्यक्रमस्थल भरिभराउ हुनु स्वभाविक नै हो । भरिभराउ हलमा उनले अन्य समयमा गरिने भाषणभन्दा अलि पृथक भाषण गरे । करिब १ घण्टा मन्तव्य राखेका युवा नेता गगन थापाले भाषणको अधिकांश समय प्राकृतिक स्रोत साधन र वन विज्ञानकै विषयमा केन्द्रीत रहेर बोले । कार्यक्रममा उनले बिगठीत संविधानसभामा प्राकृतिक स्रोत साधन उपसमितिको सदस्य रहँदा आफुले वन क्षेत्रको लागि गरेको प्रयासबारे चर्चा गरेका थिए ।

बैशाख ३ गते कार्यक्रममा मन्तव्य राख्ने क्रममा युवा नेता थापा ।

विश्वका अन्य देशहरुले विकासको क्षेत्रमा प्रगति गरिरहँदा प्राकृतिक स्रोत साधनले धनी नेपालले वन क्षेत्रबाट यथेष्ट लाभ लिन नसक्नुले नै विकासमा पछि परेको उनले सो क्रममा बताए । नेपालको आर्थिक विकासमा सबैभन्दा ठुलो हिस्सा वन क्षेत्रले ओगट्न सक्ने दाबी थापाको थियो । मन्तव्यका क्रममा उनले संसदमा कृषि तथा वन विश्वविद्यालयको विषयमा वहस चलिरहँदा वन विज्ञान अध्ययन संस्थानबाट कुनै विद्यार्थी संगठनले चासो नराखेको प्रती दुःख व्यक्त गरे । साथै वन क्षेत्रको विकासको लागि कसैले प्रस्ताव लिएर आउँछ भने आफु सहयोगको लागि तयार रहेको बताउँदै त्यसका लागि सबै राजनैतिक दलहरुलाई एक ठाउँमा उभ्याउन सक्ने उनको दाबी थियो । आफ्नो पार्टी नेपाली काँग्रेस प्राकृतिक स्रोत साधनको संरक्षणमा गम्भिर रहेको भन्दै थापाले बैशाखमा सम्पन्न महासमिति बैठकको सबैभन्दा ठुलो मुद्धा चुरे संरक्षणबारे रहेको बताए ।

बुधबार भिडियो प्रदर्शन गरिँदै ।

    कार्यक्रममा थापाले मन्तव्य राखिरहँदा खचाखच हल मन्त्रमुग्धसँग उनकै भाषणमा केन्द्रित थियो । मन्तव्यका क्रममा उनले वन विज्ञानलाई डीन युनीभर्सीटीको अवधारणामा लैजानुपर्ने भन्दै अध्ययन संस्थान परिवारलाई त्यसतर्फ लाग्न आग्रह पनि गरे ।

 यस्तो छ भिडियो
     चार घण्टा १५ मिनेट लामो भिडियोमा औपचारिक, अनौपचारिक कार्यक्रम र रात्री डान्स पार्टीको भिडियो समावेश छ । नेपाली काँग्रेसका नेताहरु विपी, सुवर्णसम्शेर, गणेशमान, कृष्णप्रसाद र गिरिजाप्रसादप्रति सम्मान व्यक्त गर्दै सुरु हुने भिडियोमा साँस्कृतिक कार्यक्रम र मन्तव्यहरुको राम्रो संयोजन छ । कार्यक्रम सम्पन्न गर्न सहयोग गर्नेहरु र ने.वि.संघमा आबद्ध विद्यार्थीहरुलाई धन्यवाद दिँदै भिडियोको समापन गरिएको छ । भिडियोको छाँयाकन र सम्पादन प्रदीप नापीतले गरेका हुन् । भिडियो हेर्नेहरुबाट भिडियो राम्रो बनेको प्रतिकृया आएको छ ।

हेर्नुहोस गगन थापाको मन्तव्य (भिडियो) 
Gagan Thapa in IOF, Pokhara - 2070 Baishakh 03 - Welcome Program