२५ बुँदे मागपत्र

 २०६९ चैत्र १९ गते शैक्षिक मुद्धाहरु सहित क्याम्पस प्रमुख समक्ष ने. वि. संघ ले बुझाएको २५ बुँदे  मागपत्र

श्रीमान् क्याम्पस प्रमुख ज्यू,  
व.वि.अ.सं., पोखरा क्याम्पस, पोखरा ।                                                                                              

                                                                  विषय : ज्ञापन पत्र सम्बन्धमा ।
  महोदय,
       सम्पूर्ण लोकतन्त्रवादी विद्यार्थीहरुलाई गोलबन्द गर्दै राष्ट्रियता, लोकतन्त्र, समाजवाद र विद्यार्थी एकता को मुलमन्त्रलाई आत्मसाथ गर्दै नेपाल विद्यार्थी संघले विद्यार्थीहरुको हकहित र शैक्षिक गुणस्तर कायम गर्नका साथै वैज्ञानिक र प्राविधिक शिक्षा प्राप्तिका लागि आफ्नो स्थापनाकालदेखि नै पहल गर्दै आइरहेको छ । शैक्षिक विकृतिको विरुद्ध विभिन्न आन्दोलनहरुको अग्रमोर्चा सम्हाल्दै आइरहेको ने.वि. संघ,क्याम्पस इकाई समिति, व.वि.अ.सं., पोखरा क्याम्पस, पोखराले क्याम्पस प्रशासनसमक्ष विगतका दिनहरुमा पनि विद्यार्थी अधिकार सुनिश्चितताको निमित्त लिखीत र मौखिक रुपमा आफ्ना विभिन्न मागहरु राख्दै आइरहेको छ । हाम्रा मागहरुका सम्बन्धमा पटकपटक क्याम्पस प्रशासनसमक्ष संझौता गर्दै, सम्झौताका फेरिस्ताहरु तयार भए, तर  पनि त्यसको उचित कार्यान्ययनमा क्याम्पस प्रशासन लाचार बन्दै आइरहेको छ । यस परिप्रेक्षमा क्याम्पसको शैक्षिक र प्रशासनिक सुधारका निमित्त ने.वि. संघ तपसिल बमोजिमका आफ्ना जायज मागहरु प्रस्तुत गर्न चाहन्छ । यस मागहरुप्रति क्याम्पस प्रशासनले वेवास्ता गरेमा त्यसका विरुद्ध हामी संघर्षको मैदानमा उत्रन बाध्य हुने जानकारी गराउँदै अबिलम्ब मागहरु पुरा गर्न जोडदार माग गर्दछौँ ।

हाम्रा मागहरुः
(क) तत्काल पुरा गर्नुपर्ने मागहरुः

१) कक्षा नियमित रुपले संचालन नभएको, साथै प्रयोगात्मक कक्षा र भ्हअगचकष्यल विरलै हुने गरेकाले सम्पुर्ण कक्षा नियमित गराउनुपर्ने । कक्षा संचालन, परीक्षा, नतिजा प्रकाशन, शैक्षिक भ्रमण समयमानै हुनेगरी शैक्षिक क्यालेन्डर सर्वसम्मतिको आधारमा बनाई प्रभावकारी रुपमा लागु गर्नुपर्ने ।
२) नयाँ विषय थप गर्ने र प्रयोगात्मक पक्षलाई प्रभावकारी बनाउने गरी कम्तिमा १२० क्रेडिट आवर  को समयसापेक्ष नयाँ पाठ्यक्रम तुरुन्त लागु गर्नेतर्फ पहल गर्नुपर्ने । साथै GIS को प्रयोग अत्यावश्यक भैसकेकाले GIS लाई अनिवार्य विषय बनाउनेतर्फ पहल गर्नुपर्ने र GIS पढ्ने विद्यार्थीबाट थप शुल्क लिने व्यवस्था खारेज गर्नुपर्ने । साथै गिस ल्यावको उचित व्यवस्थापन गर्नुपर्ने ।
३) विभिन्न शिर्षकमा भर्ना शुल्क बढाउने काम भएकाले उक्त निर्णय तुरुन्त सच्याउनुपर्ने । साथै विद्यार्थी प्रमाणित गर्दाको सिफारिसपत्र बनाउँदा समेत शुल्क लिने गरिएको पाइएकाले विद्यार्थीलाई आवश्यक सिफारिसपत्र बनाउँदा शुल्क लिने व्यवस्था हटाउनुपर्ने ।

४) विद्यार्थीहरुको लागि कक्षाकोठाको अभाव देखिएको र दुई समुहमा पढाउनुपर्नेमा एउटै कक्षा प्रयोग भइरहेको पाइएकाले तुरुन्त पर्याप्त कक्षाकोठा को व्यवस्था गर्नुपर्ने । साथै सम्पुर्ण कक्षाकोठालाई तुरुन्त कार्पेटिङ का साथै भौतिक पुर्वाधार ( फर्निचर, पंखा, बत्ति) को मर्मत र आवश्यकताअनुरुप थप गनुपर्ने र सम्पुर्ण कक्षाकोठामा LCD प्रोजेक्टओर को व्यवस्था गर्नुपर्ने ।
५) पुस्तकालयमा नयाँ संस्करणका पुस्तकका साथै पुस्तकको मात्रा थप्नुपर्ने । साथै स्थानिय पत्रिका र फरेष्ट्रि सम्बन्धीत राष्ट्रियअन्तर्राष्ट्रिय म्यागेजिन को मात्रा बढाउनुपर्ने । साथै Practical Lab मा आवश्यक सामान थप्नुपर्ने र Lab बाट विद्यार्थीलाई विनाकुनै शुल्क र विनाकुनै झन्झट सामान उपलब्ध गराउनुपर्ने ।
६) नयाँ विद्यार्थीहरुले हास्टेल प्रयोग गर्न थालेको लामो समय भैसक्दा पनि पर्दा र कार्पेटिङको कार्य सुरु नभएकाले तुरुन्त उक्त कार्य अगाडि बढाउनुपर्ने । साथै होस्टेलमा रहेको भौतिक पुर्वाधार (युरोगार्ड, फर्निचर, पंखा, बत्ति) को मर्मत संभार र होस्टेलको नियमित सरसफाई गर्ने व्यवस्था मिलाउनुपर्ने । महिला छात्रावासमा फर्निचरको अभाव देखिएकाले तुरुन्त व्यवस्था गर्नुपर्ने ।
७) क्याम्पस प्राङ्गणका रुखहरु काट्ने तर रोप्ने काम नभएकाले यथाशिघ्र वृक्षारोपणको काम अगाडि बढाउनुपर्ने । साथै उचित व्यवस्थापन सहित Hi-Tech नर्सरीको व्यवस्था गर्नुपर्ने ।

८) क्याम्पस प्राङ्गणमा रहेका सडक बत्तिहरुको मर्मत, अडिटोरियम हलका भौतिक पुर्वाधार (कुर्ची, पंखा, बत्ति) को मर्मत संभार र आवश्यकताअनुसार थप गर्नुपर्ने । साथै क्याफ्टेरियाको रंगरोदन र सरसफाईतर्फ ध्यान दिनुपर्ने र मेस संचालन समितिको बैठक नियमित गराउनुपर्ने ।
९) क्यापिटेशनको रकम किस्ताबन्दीमा तेस्रो वर्षभित्र तिरीसक्नेगरी व्यवस्था गर्नुपर्ने ।
१०) लामो प्रयासपछि होस्टेलमा इन्टरनेटको व्यवस्था भएता पनि निशुल्क व्यवस्था हुनुनसकेकाले इन्टरनेटलाई निशुल्क व्यवस्था गर्नेतर्फ पहल गनुपर्ने । 

(ख) पुरा गरिदै लगिनुपर्ने मागहरुः

११) श्ौक्षिक सुधार समितिको बैठक नियमित नभएकाले विद्यार्थी प्रतिनिधि सहितको उक्त समितिको बैठक नियमित गरी शैक्षिक सुधारका काम अगाडि बढाउनुपर्ने । साथै क्याम्पसमा देखिरहने कर्मचारी ढिलासुस्ती र प्राध्यापकहरुको अनुपस्थितिको अनुगमन गरी शैक्षिक र प्रशासनिक कामकारबाहीलाई चुस्त राख्नुपर्ने ।
१२) विद्यार्थीको क्षमता विकासको लागि विभिन्न तालिम,सेमिनारहरु का साथै खेलकुद र अतिरिक्त क्रियाकलापका गतिविधिहरु संचालन गर्नुपर्ने ।
१३) क्याम्पसका महत्वपूर्ण निर्णयहरुमा विद्यार्थी पक्षलाई वेवास्ता गरी स्वेच्छाचारी ढङ्गले निर्णय गर्ने परिपाटी निर्माण हुन थालेकाले त्यस्ता निर्णयहरु गर्नुपुर्व स्व.वि.यु. र विद्यार्थी संगठनहरुसँग छलफल गर्नुपर्ने । साथै क्याम्पस र प्रोजेक्ट का विभिन्न बैठकहरुमा विद्यार्थी प्रतिनिधिको रुपमा स्व.वि.यु.प्रतिनिधिलाई सहभागी गराउनुपर्ने ।
१४) क्याम्पसमा छुट्टै रिसर्च विभागको व्यवस्था गनुपर्ने र स्नातक तह चौथो वर्षका विद्यार्थीहरुलाई रिसर्च को लागि आवश्यक Fund उपलब्ध गराउनेतर्फ कार्बाहि अगाडि बढाउनुपर्ने । 

१५) वनपाले डाँडा र शान्ति वन वाटीकामा Research and Demonstration Plot  निर्माण गर्नुपर्ने ।
१६) छात्रवृत्ति समयमानै उपलब्ध गराउनुपर्ने र समयानुकुल छात्रवृत्ति रकम बढाउनुपर्ने ।
१७) स्नातोकत्तर को भर्ना नियमित नभइरहेकोले भर्ना नियमित गर्नुपर्ने र थप विषय थप्नेतर्फ पहल गर्नुपर्ने ।
१८) Student Exchange Program को लागि आवश्यक पहल गर्नुपर्ने ।
१९) वन विज्ञान शिक्षाको विकासका लागि यस क्याम्पसलाई वन विश्वविद्यालयको रुपमा विकास गर्नको लागि पहल गर्नुपर्ने ।
२०) हाल अध्ययन संस्थानको नाममा डिन कार्यालयको मात्र वेवसाइट रहेको र त्यो पनि नियमित Update नभएको अवस्थामा, त्यसको Update का साथै क्याम्पसको छुट्टै वेवसाइट बनाउनुपर्ने र स्नातक र स्नातकोत्तर तहका विद्यार्थीहरुको Thesis राख्ने व्यवस्था गर्नुपर्ने ।
२१) क्याम्पसको आर्थिक गतिविधिको पारदर्शीताको लागि सार्वजनिक सुनुवाई कार्यक्रमको आयोजना गर्नुपर्ने ।
२२) Metorological Station को स्थापनार्थ पहल गर्नुपर्ने ।
२३) पुस्तकालयलाई Online Library को रुपमा विकास गर्नेतर्फ पहल गर्नुपर्ने ।
२४) सुरक्षा व्यवस्था राम्रो बनाई क्याम्पसमा अनुमतिबेगर अनाधिकृत व्यक्तिको प्रवेशमा पुर्ण रोक लगाउनुपर्ने ।
२५) खेलकुद मैदान (फुटबल मैदान, बास्केटबल कोर्ट, भलिबल कोर्ट, टेवलटेनिस बोर्ड आदी)  को उचित मर्मत संभारसहित व्यवस्थापन गर्नुपर्ने । 

         उल्लेखित हाम्रा मागहरुप्रति ऐक्यवद्धतका लागि सम्पुर्ण प्राध्यापक, कर्मचारी, विद्यार्थी एवं समस्त शुभचिन्तकहरुप्रति हार्दिक अनुरोध गर्दछौँ ।

                           जय नेपाल !

                                                                                         

(महेश न्यौपाने)                                    (नविन वि.क.)

   सचिव                                            सभापति

सुरु भयो चुनावी चहलपहल

एन बी सफल
पोखरा / बैशाख ३०

                 ने.वि.संघ, व.वि.अ.सं, पोखराले आसन्न स्व.वि.यू निर्वाचनको तयारी सुरु गरेको छ । यही जेठ २३ गते हुने निर्वाचनको तयारीको क्रममा आज क्याम्पस हाताभित्र एक अन्तक्र्रिया कार्यक्रम सम्पन्न भएको छ । नेपाली काँग्रेस, नेपाल तरुण दल र ने.वि.संघका नेता कार्यकर्ताबीच उक्त अन्तक्र्रिया कार्यक्रम भएको हो । इकाई सभापति नविन वि.क.को सभापतित्वमा सम्पन्न कार्यक्रममा कास्की काँग्रेसका सचिव युवराज कुँवरले इकाईलाई तत्काल निर्वाचनको तयारीमा जुट्न निर्देशन दिँदै कास्की काँग्रेस हर प्रकारका सहयोगको लागि तयार भएको बताउनुभयो । साथै उहाँले कास्कीका कुनै पनि क्याम्पसमा ने.वि.संघको समानान्तर प्यानल खडा नहुने दावी गर्दै त्यस्तो भएमा तत्काल कारबाही गर्ने बताउनुभयो । कार्यक्रममा कास्की काँग्रेसका सह–सचिव तथा विद्यार्थी विभाग प्रमुख मुकुन्द बाँस्तोलाले सकभर निर्वाचन अघिनै जिल्ला विवाद मिलाउने ठोकुवा गर्दै त्यसकै कारणले स्व.वि.यू. निर्वाचनमा असर पुग्न नदिने दावी गनुभयो ।
                 कार्यक्रममा बोल्दै तरुण दल कास्कीका अध्यक्ष ऋषी काफ्लेले ने.वि.संघ, व.वि.अ.सं इकाई नमुना भएको भन्दै जिल्लाले समेत यस इकाईबाट पाठ सिक्नुपर्ने बताउनुभयो । ने.वि.संघका केन्द्रिय सदस्य सरोज के.सी.ले स्व.वि.यू निर्वाचन मिनि संविधानसभाको निर्वाचन रहेकाले यो जीवन मरणको सवाल रहेको धारणा व्यक्त गर्नुभयो । साथै उहाँले निर्वाचनको लागि आवश्यक सम्पूर्ण कामकारबाही सुरु गर्न इकाईलाई निर्देशन दिनुभयो । ने.वि.संघका केन्द्रिय सदस्य गोबिन्द लामिछानेले उमेद्वार चयनको लागि इकाई स्वतन्त्र रहेको बताउदैँ कहिँ कसैबाट हस्तक्षप नहुने र हुन नदिने बताउनुभयो । कार्यक्रममा उप–प्राध्यापक द्वय सुमन भट्टराई र विष्णु देवकोटाले ने.वि.संघ, व.वि.अ.संको विगत र वर्तमानबारे चर्चा गर्नुभयो । कार्यक्रममा विद्यार्थी नेता देवकृष्ण पराजुलीले कास्की ने.वि. संघ एक हुन नसकेको यथार्थ स्विकार्दै त्यसबाट इकाईलाई कुनै असर पुग्न नदिने बताउनुभयो ।
                   निवर्तमान इकाई उप–सभापति निरज बाबु भट्टले स्व.वि.यू निर्वाचनको लागि केन्द्र र जिल्लाको रणनिति/कार्यनितिको माग गर्दै जिल्ला विवादलाई तत्काल सुल्झाएर सबै क्याम्पसमा निर्वाचन जित्ने वातावरण निर्माण गर्नतर्फ लाग्नुपर्ने धारणा व्यक्त गर्नुभयो । कार्यक्रममा विद्यार्थी नेता रामचन्द्र पोखरेल, राजन श्रेष्ठ, धिरोजप्रसाद कोइराला, सरोज खड्का, महेश न्यौपाने लगायतले आ–आफ्नो विचार व्यक्त गर्नुभएको थियो । कार्यक्रमको समापन गर्दै इकाई सभापति नविन वि.क.ले व.वि.अ.सं.मा ने.वि.संघको जित सुनिश्चित रहेको दावी गर्दै केन्द्र र जिल्लाको उचित सहयोगको लागि अनुरोध गनुभयो ।
              दुई–दुई वर्षमा हुनुपर्ने स्व.वि.यू. निर्वाचन विगत ४ वर्षदखी हुन सकिरहेको छैन । पछिल्लोपटक २०६५ चैत्र महिनामा सम्पन्न निर्वाचनमा व.वि.अ.सं मा ने.वि.संघले एमाले अखिल र अखिल क्रान्तिकारीको संयुक्त प्यानललाई पराजित गरि विजय हासिल गरेको थियो ।

WELCOME PROGRAM 2070 Baishakh 3